Чэшскія хакеісты атрымалі перамогу на дамашнім чэмпіянаце свету
Фота з архіва
27 мая, Мінск . Зборная Чэхіі па хакеі стала пераможцам дамашняга чэмпіянату свету 2024 года,
У фінале гаспадары планетарнага форуму сустракаліся са швейцарцамі. Першай закінутай шайбы гледачам на арэне ў Празе давялося чакаць да 50-й мінуты матчу — аўтарам гола стаў самы вядомы чэшскі хакеіст сучаснасці Давід Пастрняк, для якога гэты дакладны кідок аказаўся першым на турніры. Выратавацца ў астатні час госці не змаглі, а за некалькі секунд да сірэны Давід Кампф паразіў пустыя вароты і ўстанавіў канчатковы лік — 2:0 на карысць чэхаў.
Перамога на чэмпіянаце свету стала для зборнай Чэхіі сёмай у яе гісторыі пасля трыумфаў у 1996, 1999, 2000, 2001, 2005 і 2010 гг. Швейцарцы пацярпелі чацвёртае паражэнне ў фіналах, залатых медалёў гэта каманда яшчэ не выйгравала. Трэцяе месца ЧС-2024 занялі шведы, якія абыгралі ў матчы за бронзу канадцаў з лікам 4:2.
На стадыі чвэрцьфіналаў з турніру ў Празе і Остраве выбылі зборныя ЗША, Германіі, Фінляндыі і Славакіі. На пазіцыях з 9-й па 14-ю размясціліся каманды Латвіі, Аўстрыі, Нарвегіі, Казахстана, Даніі і Францыі. Элітны дывізіён чэмпіянату свету пакінулі хакеісты Вялікабрытаніі і Польшчы, ім на змену ў наступным годзе прыдуць зборныя Славеніі і Венгрыі. ЧС-2025 прымуць шведскі Стакгольм і дацкі Хернінг.
