Навагрудку 980 гадоў |
У 2024 годзе Навагрудак, адзін з самых старажытных гарадоў Беларусі, святкуе 980-годдзе з дня першага летапіснага згадвання.
З гісторыі Навагрудка
Упершыню ў летапісах Навагрудак згадваецца ў 1044 годзе ў сувязі з паходам Яраслава Мудрага на Літву.
Навагрудак — першая сталіца Вялікага Княства Літоўскага, менавіта тут у 1253 годзе адбылася каранацыя заснавальніка ВКЛ Міндоўга.
У канцы ХIV стагоддзя ў Навагрудку пачалося будаўніцтва каменнага замка-крэпасці. Доўгі час гэты замак быў адным з самых непрыступных у рэгіёне.
У 1511 годзе горад атрымаў Магдэбургскае права, з 1595 года меў уласны герб.
У 1795 годзе ўвайшоў у склад Расійскай імперыі, у 1939 годзе — у склад БССР.
8 ліпеня 1944 года Навагрудак быў вызвалены ад нямецка-фашысцкіх акупантаў у час Беластоцкай аперацыі.
У 1997 годзе Навагрудак і Навагрудскі раён аб’яднаны ў адзіную адміністрацыйна-тэрытарыяльную адзінку.
Навагрудак сучасны
Плошча горада — 13,17 кв.км.
Насельніцтва — 27,9 тыс. чалавек (на 1 студзеня 2024 г.).
Навагрудчына сёння — рэгіён з сучаснай прамысловай і сельскагаспадарчай вытворчасцю, дарожна-будаўнічым комплексам, шырокай сеткай устаноў адукацыі, аховы здароўя, культуры.
Багацце культурнай спадчыны адлюстравана ў шматлікіх помніках архітэктуры, сярод іх: Барысаглебская царква, Навагрудскі замак, Фарны касцёл, Міхайлаўскі касцёл, Гара Міндоўга і інш.
Крыніцы: Навагрудскі райвыканкам, адкрытыя крыніцы.
