АСВОД назваў асноўныя прычыны гібелі на вадзе і нагадаў правілы бяспекі
Фота з архіва
5 ліпеня, Мінск . Стан алкагольнага ап’янення з’яўляецца адной з асноўных прычын гібелі людзей на вадзе. Аб гэтым у прэс-цэнтры БЕЛТА расказала журналістам афіцыйны прадстаўнік АСВОД Кацярына Міхалёва.
«Асноўныя прычыны — гэта падзенне ў ваду або купанне ў стане алкагольнага або наркатычнага ап’янення. Гэта могуць быць і розныя сітуацыі пры купанні. Пачынаючы ад спробы пераплысці вадаём і заканчваючы заплывам за буйкі», — сказала Кацярына Міхалёва.
У сваю чаргу вадалазны спецыяліст АСВОД Юрый Штурхецкі нагадаў правілы бяспечных паводзін на вадзе. «Купацца варта толькі ў дазволеных месцах з абсталяванымі пляжамі. Ні ў якім разе нельга заплываць за буйкі і заходзіць у ваду ў нецвярозым стане. Пры выкарыстанні спартыўнага інвентару, напрыклад сапборда, нашэнне выратавальнай камізэлькі абавязкова», — сказаў ён.
Калі размова ідзе пра дзяцей, то дарослыя павінны навучаць іх правілам бяспекі на асабістым прыкладзе. «За дзецьмі варта ўважліва сачыць, не выпускаць іх з поля зроку і ні ў якім разе не дазваляць заплываць за буйкі. Маленькім дзецям рэкамендуецца купацца на мелкаводдзі», — падкрэсліў Юрый Штурхецкі.
