Беларускія гімнасткі заваявалі пяць медалёў на міжнародным турніры ў Партугаліі
Фота Беларускай асацыяцыі гімнастыкі
7 мая, Мінск . Беларускія грацыі паспяхова выступілі на прадстаўнічым міжнародным турніры па мастацкай гімнастыцы ў партугальскім Партымане, паведамілі БЕЛТА ў прэс-службе Беларускай асацыяцыі гімнастыкі.
У актыве нашай каманды пяць медалёў — два залатыя і тры сярэбраныя. Па выніках мнагабор’я на другую прыступку п’едэстала ўзнялася Лізавета Зоркіна, якая набрала за чатыры практыкаванні 118.250 бала. Атрымаць больш змагла толькі прадстаўніца Германіі Лада Пуш (120.050). У дзясятцы мацнейшых фінішавалі яшчэ дзве беларускі — Дар’я Ткачова заняла шостае месца, а Аліна Рэчкіна стала восьмай.
У заключны дзень спаборніцтваў нашы грацыі дабавілі чатыры ўзнагароды ў фіналах асобных відаў. Лізавета Зоркіна перамагла ў практыкаванні з булавамі, а таксама паказала другія рэзультаты ў праграмах з абручом і мячом. Не засталася без медаля вышэйшай пробы і Дар’я Ткачова, якая лепш за ўсіх справілася з мячом. Турнір па мастацкай гімнастыцы ў Партымане з’яўляецца адным са старэйшых у Еўропе, у бягучым годзе спаборніцтвы прайшлі 31-ы раз.
