Больш за 100 экспанентаў з шасці краін: у Мінску стартуе выстаўка-кірмаш тавараў легпрама ВТІ
Фота BTI
2 кастрычніка, Мінск . Міжнародная выстаўка-кірмаш па аптовым продажы тавараў лёгкай прамысловасці BelTexIndustry, або BTI-2024, пачынае работу ў экспазіцыйных памяшканнях комплексу па пр.Пераможцаў у Мінску. Праграма мерапрыемстваў насычаная і разлічана на тры дні,
Выстаўка BTI змагла зарэкамендаваць сябе як унікальную пляцоўку для дэманстрацыі арыгінальных навінак і трэндаў будучага моднага сезона, месца правядзення бізнес-сустрэч з абмеркаваннем актуальных тэм развіцця галіны і карысную лакацыю, якая прадастаўляе магчымасць для заключэння кантрактаў і падпісання дагавораў. У рамках дзелавой праграмы выстаўкі праходзяць спецыялізаваныя семінары і арганізуюцца бізнес-дыялогі з удзелам кіраўнікоў вядучых прадпрыемстваў, прадстаўнікоў гандлю і СМІ, праводзяцца прэзентацыі кампаній і паказы калекцый адзення і абутку.
«Кожны год калекцыі будучага сезона прэзентуюць каля 100 экспанентаў. Геаграфія ВТІ-2024 — Беларусь, Турцыя, Расія, Казахстан, Кыргызстан, Узбекістан. Вядома, усе з нецярплівасцю чакаюць урачыстую цырымонію адкрыцця выстаўкі, якую арганізатары абяцаюць зрабіць сапраўднай падзеяй. Магу праанансаваць, што цырымонія афіцыйнага адкрыцця пройдзе пад галоўным сімвалам 2024 года — «Якасць», — расказала загадчыца сектара знешніх камунікацый «БелЭкспа» Ганна Пяткевіч.
Аўтары сцэнарыя адкрылі яшчэ больш цікавых фактаў. Так, пачнецца грандыёзны форум з перформанса выхаванцаў Нацыянальнага цэнтра мастацкай творчасці дзяцей і моладзі, а прадоўжыцца прэзентацыяй флагманскіх праектаў канцэрна «Беллегпрам» — «Брэнды якасці». У іх ліку «Мерч Першага», канцэпт-store «Да Дому», адзенне з дзяржаўнай і нацыянальнай сімволікай, айчынны брэнд дзіцячых тавараў, эстэтыка спорту — стварэнне спартыўнага адзення, паказ «#МЫКАЧЕСТВО» з удзелам медыйных персон нашай краіны і прадстаўленнем брэндаў канцэрна «Беллегпрам», паказ сумеснай калекцыі двух вядучых прадпрыемстваў Кыргызстана і Беларусі і дэманстрацыя некалькіх калекцый восень-зіма новага сезона.
Адметнасцю выстаўкі ВТІ-2024 стане выступленне Сяргея Сысоева. Замежны мадэльер уваходзіць у Асацыяцыю высокай моды і прэт-а-партэ Расіі, міжнародную асацыяцыю «Саюз дызайнераў», разам з тым з’яўляецца стваральнікам брэнда SERGEY SYSOEV і лаўрэатам прэмій Fashion TV і Кубка мэра Масквы. Для прафесійнай супольнасці, экспертаў моды і людзей, якія проста захапляюцца fashion-тэматыкай, спікер — вельмі аўтарытэтны і цікавы, размова з якім можа быць карыснай для бізнесу і творчасці і нават натхніць.
Намеснік дырэктара па выставачнай дзейнасці «БелЭкспа» Вікторыя Агафонава дадала, што ў выстаўцы ВТІ ўпершыню прымаюць удзел прадстаўнікі міжнароднай выстаўкі лёгкай прамысловасці Fashion Style Russia, якая аб’ядноўвае ўсе галіны лёгкай прамысловасці і сегменты моды: жаночае, мужчынскае і дзіцячае адзенне і абутак, ніжнюю бялізну, футра і скуру, аксесуары, камплектуючыя для вытворчасці, сферу паслуг і кантрактную вытворчасць. На калектыўным стэндзе D4 у Мінску будуць прадстаўлены мадэлі расійскіх дызайнераў Gera Skandal, Сафі Сафа, Саніябрэнд, NAEDINE і NS.
Стартуе першы выставачны дзень з экспертнага дыялогу, прысвечанага актуальным пытанням супрацоўніцтва ў галіне лёгкай прамысловасці, пры ўдзеле прадстаўнікоў падведамных прадпрыемстваў, кіраўнікоў арганізацый і прадпрымальнікаў з краін блізкага і далёкага замежжа.
48-я міжнародная спецыялізаваная выстаўка-кірмаш па аптовым продажы тавараў лёгкай прамысловасці BelTexIndustry будзе адкрыта для наведвальнікаў з 10.00 да 18.00 2 і 3 кастрычніка, у апошні дзень, 4 кастрычніка, форум будзе працаваць да 16.00. Уваход на выстаўку свабодны.
