Больш за 16 працэнтаў інвестыцый у Беларусі ідзе ў сельскую гаспадарку
Фота з архіва
14 лістапада, Мінск . На гэты момант у сельскую гаспадарку накіроўваецца звыш 16 працэнтаў інвестыцый ад агульнага аб’ёму інвестыцый у асноўны капітал, і галіна, безумоўна, дае аддачу. Такую заяву ў час прэс-канферэнцыі, прысвечанай харчовай бяспецы Беларусі і эфектыўнасці дзяржпадтрымкі прадпрыемстваў АПК, зрабіла намеснік дырэктара па навуковай рабоце Інстытута сістэмных даследаванняў у АПК Нацыянальнай акадэміі навук Беларусі Святлана Кандраценка,
«Харчовая бяспека для Беларусі заўсёды была і застаецца адным з важнейшых прыярытэтаў сацыяльна-эканамічнага развіцця і аграрнай палітыкі. Ва ўмовах зменлівай глабальнай эканомікі, калі доступ да прадуктаў харчавання і аграрных тэхналогій для многіх краін вызначае іх незалежнасць, Беларусь прытрымліваецца ўзважанай і збалансаванай стратэгіі. Мы нарошчваем патэнцыял уласнага аграпрамысловага комплексу, імкнёмся забяспечыць тэхналагічны суверэнітэт, развіваем новыя галіны», — падкрэсліла эксперт.
Сельская гаспадарка сёння фарміруе больш за 7 працэнтаў валавога ўнутранага прадукту краіны і амаль 7 працэнтаў рабочых месцаў для айчыннай эканомікі. У 2024 годзе забяспечана выражаная дадатная дынаміка сельскагаспадарчай вытворчасці. «Гэта выдатны вынік», — робіць акцэнт Святлана Кандраценка. Для параўнання: у нашай краіне на аднаго жыхара ў год атрымліваецца 908 кг малака, а ў сярэднім па Еўразійскім эканамічным саюзе — 275 кг. Жывёлы і птушкі ў Беларусі рэалізуецца на забой 139 кг, а ў сярэднім па пяцёрцы еўразійскіх партнёраў — 78 кг.
Як падкрэсліла намеснік дырэктара па навуковай рабоце, Беларусь традыцыйна ўваходзіць у топ экспарцёраў малочных прадуктаў, топ экспарцёраў мяса і мясапрадуктаў. Беларускія прадукты харчавання штогод пастаўляюцца ў больш як 100 дзяржаў.
«Прэзідэнт неаднаразова падкрэсліваў, што Беларусь не толькі гарантуе поўнае задавальненне патрэбнасці ўласнага насельніцтва ў прадуктах харчавання высокай якасці, але і гатова ўносіць важкі ўклад у забеспячэнне харчовай бяспекі ва ўсім свеце, і сёння наша краіна ўжо стала надзейным партнёрам у вырашэнні задач харчовай бяспекі для Еўразійскага эканамічнага саюза, СНД, ШАС і далёкага Афрыканскага рэгіёна», — канстатавала супрацоўнік Інстытута сістэмных даследаванняў АПК.
Паводле слоў Святланы Кандраценкі, за мяжой запатрабаваны не толькі якасныя айчынныя харчовыя тавары, але і беларускія комплексныя вытворчыя рашэнні для жывёлагадоўлі, сельскагаспадарчая тэхніка, тэхналогіі перапрацоўкі сыравіны, інфраструктурныя рашэнні для сельскай мясцовасці — наша ноу-хау — аграгарадкі. Новыя магчымасці адкрывае кааперацыя ў навуковай і вытворчай сферах.
«Экспартуючы прадукцыю, уласныя ўнікальныя тэхналогіі, кампетэнцыі, веды ў галіне аграпрамысловай вытворчасці, Беларусь папулярызуе нацыянальны харчовы брэнд», — рэзюмавала намеснік дырэктара па навуковай рабоце Інстытута сістэмных даследаванняў у АПК Нацыянальнай акадэміі навук.
