Качанава пра патэнцыял Віцебскай вобласці: тут трэба працаваць эфектыўна
15 лістапада, Шуміліна /Алеся Пушнякова . Віцебскую вобласць можна зрабіць лепш, вывесці ў лідары, калі працаваць эфектыўна і разам. Такое меркаванне, падводзячы вынік пашыранага пасяджэння Прэзідыума Савета Рэспублікі Нацыянальнага сходу Беларусі, выказала старшыня Савета Рэспублікі Наталля Качанава,
Паводле слоў Наталлі Качанавай, вакол Беларусі складваецца няпростая абстаноўка. «Усё, што накіравана супраць нашай краіны — і санкцыйны націск, і гібрыдная вайна, — гэта ў поўнай меры не сціхла. Гэта не адышло некуды», — сказала яна. Менавіта таму народу варта з’яднацца і разам вырашаць узнікаючыя пытанні і праблемы.
Спікер адзначыла, што ўзаемадзеянне павінна быць наладжана на ўсіх узроўнях улады і паміж міністэрствамі, ведамствамі. Наталля Качанава расказала, як важна, каб моладзь і кваліфікаваныя спецыялісты заставаліся ў рэгіёнах. І для гэтага неабходна стварыць спрыяльныя ўмовы. Таксама варта выкарыстоўваць і існуючы патэнцыял кожнага рэгіёна. Напрыклад, на Браслаўшчыну можна прыцягнуць інвестараў для будаўніцтва пансіяната для адпачывальнікаў.
Наталля Качанава падкрэсліла, што любыя пытанні і праблемы можна вырашыць разам, прыцягваючы насельніцтва, прадпрыемствы, бізнес, каб палепшыць жыццё ў рэгіёне, і пры гэтым важна захаваць мір у краіне.
«Тут трэба працаваць эфектыўна. Трэба працаваць так, каб усе задачы, якія перад намі пастаўлены, былі выкананы. Калі гэта праваахоўнікі, то трэба не дапусціць парушэння правапарадку, таму што брэнд нашай краіны — гэта спакой», — падкрэсліла старшыня Савета Рэспублікі.
Яна яшчэ раз нагадала, што ў рабоце са зваротамі грамадзян не павінна быць прабелаў, кожнае пытанне трэба браць на кантроль і ставіцца да людзей з разуменнем.
Пасля пасяджэння ўдзельнікі мерапрыемства ўсклалі кветкі да брацкай магілы, ушанаваўшы памяць воінаў, якія загінулі за вызваленне Шумілінскага раёна ў гады Вялікай Айчыннай вайны.
