Канадскі форвард Дзюбэ з вопытам гульні ў НХЛ перайшоў у мінскае «Дынама»
Дзілан Дзюбэ. Фота Getty Images
1 ліпеня, Мінск . Хакейнае мінскае «Дынама» аб’явіла аб падпісанні кантракта з канадскім нападаючым Дзіланам Дзюбэ, паведамілі БЕЛТА ў прэс-службе сталічнага клуба.
Чатыры папярэднія сезоны 25-гадовы нападаючы выступаў у Нацыянальнай хакейнай лізе за «Калгары Флэймз», дзе выходзіў на лёд у тым ліку разам з беларусамі Ягорам Шаранговічам і Ільёй Салаўёвым. Усяго ў галоўнай лізе планеты Дзюбэ правёў 325 матчаў, у якіх набраў 127 (57+70) ачкоў. Таксама Дзілан гуляў у Амерыканскай хакейнай лізе за «Стоктан Хіт», зарабіўшы 56 балаў за 57 сустрэч.
Дзюбэ быў выбраны «Калгары» на драфце НХЛ 2016 года пад агульным 56-м нумарам. Нападаючы двойчы прадстаўляў зборную Канады-U20 на маладзёжных чэмпіянатах свету. На МЧС-2017 стаў сярэбраным прызёрам, а ў наступным годзе ў статусе капітана прывёў каманду да трафея. Тады хакеіст набраў 5 (3+2) ачкоў у 7 матчах.
«Вельмі рады, што ўдалося аформіць гэты трансфер. Дзілан Дзюбэ — форвард высокага ўзроўню, топавы ігрок для любога клуба КХЛ. Ведаем, што ён вельмі моцны фізічна, тэхнічны на лёдзе, прыветлівы і адкрыты ў калектыве. Чакаем, што яго гульнявыя і лідарскія якасці дапамогуць мінскаму «Дынама», — сказаў генеральны дырэктар «зуброў» Арцём Каркоцкі.
Дзілан Дзюбэ стаў пятым паўночнаамерыканскім іграком, які папоўніў склад сталічнага клуба ў гэта міжсезонне. Раней кантракты з «Дынама» падпісалі абаронцы Брэдзі Лайл, Джош Брук, Ксаўе Уэле і Джордан Грос.
