Краіны СНД выступілі за забарону на размяшчэнне ў космасе любога віду зброі
Фота з архіва
21 мая, Мінск . У Мінску 21 мая прайшло чарговае пасяджэнне Сумеснай кансультатыўнай камісіі па пытаннях раззбраення (СККР). Аб гэтым БЕЛТА паведамілі ў прэс-службе Выканкама СНД.
У пасяджэнні прынялі ўдзел прадстаўнікі Беларусі, Арменіі, Казахстана, Кыргызстана, Расіі, Таджыкістана, Туркменістана, Узбекістана, а таксама супрацоўнікі Выканаўчага камітэта СНД. У якасці наглядальніка прысутнічаў прадстаўнік Азербайджана. У рамках СККР абмяркоўвалася праблематыка прадухілення гонкі ўзбраенняў у касмічнай прасторы. Падкрэслена неабходнасць выпрацоўкі адпаведнага міжнароднага юрыдычна абавязваючага інструмента з забаронай на размяшчэнне зброі любога віду на калязямной арбіце.
Удзельнікі дамовіліся прыкладаць сумесныя намаганні па глабалізацыі ініцыятывы / палітычнага абавязацельства аб неразмяшчэнні першымі зброі ў космасе і прадоўжыць нарошчванне ўзаемадзеяння на профільных міжнародных пляцоўках. Наступнае пасяджэнне СККР плануецца правесці ў Маскве ў снежні 2024 года.
