Лукашэнка пра формулу супрацоўніцтва з рэгіёнамі Расіі: калі нешта трапіла пад забарону — купляйце беларускае | Навіны Беларусі | Беларускія навіны | Беларусь — афіцыйныя навіны | Мінск | БелТА
30 верасня, Мінск . Прэзідэнт Беларусі Аляксандр Лукашэнка прапанаваў універсальную формулу супрацоўніцтва кіраўнікам расійскіх рэгіёнаў: калі нешта трапіла пад забарону — купляйце беларускае. Адпаведную заяву кіраўнік дзяржавы зрабіў 30 верасня на сустрэчы з кіраўніком Рэспублікі Саха (Якуція) Расіі Айсенам Нікалаевым,
Кіраўнік дзяржавы цёпла прывітаў кіраўніка расійскага рэгіёна на гасціннай беларускай зямлі: «З вялікім інтарэсам ставімся да вашай дэлегацыі, таму што і зямля ў вас такая незвычайная, рамантычная, і для мяне ў тым ліку, хоць я вельмі добра ведаю Расію. Велізарныя прасторы, багацейшыя прыродныя рэсурсы. І, галоўнае, людзі ў вас вельмі мужныя, працавітыя». У гэтым сэнсе Прэзідэнт звярнуў увагу на некаторую агульнасць рыс народаў Беларусі і Якуціі, асабліва ў іх мэтанакіраванасці.
Што датычыцца сфер узаемных інтарэсаў, то яны, паводле слоў Прэзідэнта, могуць быць разнастайнымі. А цяпер яны яшчэ і прадыктаваны пэўным націскам з боку Захаду. «Я маю на ўвазе заходнія фашысцкія санкцыі. Як я гавару кожнаму расійскаму губернатару: калі нешта трапіла пад забарону, купляйце беларускае, — адзначыў Аляксандр Лукашэнка. — Мы, напэўна, на шмат працэнтаў зможам замясціць вам заходнія тавары».
Калі гаварыць у гэтым сэнсе пра Якуцію, якой патрэбна замена імпартнай тэхнікі для горназдабыўных прадпрыемстваў, то Беларусь яе вырабляе. І маштабныя інвестыцыйныя праекты ў гэтай галіне дазваляюць нарасціць пастаўкі ў некалькі разоў. «Знакамітыя кар’ерныя самазвалы беларускага аўтазавода БЕЛАЗ дапамогуць перавыканаць усе планы Якуціі па павелічэнні здабычы карысных выкапняў. Нашы велікагрузы зарэкамендавалі сябе выдатна ў рэгіёнах Расійскай Федэрацыі», — сказаў Прэзідэнт.
Размова таксама ішла аб магчымасцях па пастаўцы горназдабыўнога абсталявання. У прыватнасці, аб прадукцыі прадпрыемства «Ніва-Холдынг» з Салігорска, якая з’яўляецца не проста выдатнай альтэрнатывай заходнім узорам, але і ўлічвае спецыфіку работы і патрабаванні любога пакупніка. «Мы працуем комплексна. Пры вашым жаданні і гатоўнасці зрабіць стаўку на нашы машыны і абсталяванне Беларусь зможа арганізаваць у Якуціі мультыбрэндавы сэрвісны цэнтр, — запэўніў Аляксандр Лукашэнка. — Галоўнае, каб аб’ёмы былі для гэтага».
Адной з тэм на сустрэчы стала будаўніцтва і патэнцыял задзейнічання ў гэтай сферы беларускіх спецыялістаў. Якуція цяпер актыўна развіваецца. Ідзе будаўніцтва абагачальных фабрык, падземных руднікоў, асваенне радовішчаў карысных выкапняў. «Значыць, патрэбны рабочыя рукі. А людзі, прыязджаючы на работу, хочуць жыць у нармальных, камфортных умовах, асабліва ў вашым суровым краі, — сказаў кіраўнік дзяржавы. — Вы правільна робіце, што будуеце новыя сучасныя мікрараёны ў Якуцку і Нерунгры. Мы, развіваючы вялікія вытворчасці, робім гэтак жа». Прэзідэнт звярнуў увагу, што ў Беларусі ёсць выдатныя будаўнікі і высокія стандарты гарадской інфраструктуры. А айчынныя праектныя і будаўнічыя арганізацыі гатовы працаваць з Якуціяй.
У час знаходжання ў Беларусі ўдзельнікі дэлегацыі расійскага рэгіёна маюць намер наведаць гомельскае ВА «Крышталь», унікальнае прадпрыемства, якое ажыццяўляе агранку брыльянтаў рознага памеру. «Мы больш інтэнсіўна пачалі супрацоўнічаць з вашымі прадпрыемствамі. Упэўнены, што пасля вашага візіту гэта актыўнасць павялічыцца», — сказаў на сустрэчы Аляксандр Лукашэнка.
Перспектыўнай тэмай, якую Прэзідэнт лічыць неабходным прапрацаваць, з’яўляецца таксама арганізацыя прамых паставак беларускіх харчовых тавараў з выкарыстаннем кантэйнерных перавозак. «Калі гатовы прадставіць пералік прадукцыі, якая вас цікавіць, мы зможам вельмі хутка нарасціць пастаўкі», — адзначыў кіраўнік дзяржавы.
Разам з тым супрацоўніцтва з Якуціяй не павінна абмяжоўвацца толькі эканомікай, упэўнены Аляксандр Лукашэнка. Яно павінна ўключаць гуманітарнае супрацоўніцтва і ўдзел у спартыўных спаборніцтвах, у тым ліку спецыфічных, характэрных менавіта для Якуціі. «У нас вельмі шмат відаў спорту, дзе мы можам з вамі спаборнічаць. Але калі вы нас навучыце сваім відам, спецыфічным, мы будзем вам вельмі ўдзячныя», — адзначыў Прэзідэнт. Ён таксама нагадаў, што ў гэтым годзе Беларусь прыняла ўдзел у міжнародных гульнях «Дзеці Азіі», якія праходзілі ў Якуціі, і нядрэнна там выступіла.
Кіраўнік дзяржавы падзякаваў Айсену Нікалаеву за інтарэс да Беларусі і гатоўнасць працаваць з нашай краінай, нягледзячы на значную адлегласць. Прэзідэнт таксама гарантаваў, што ўсе дасягнутыя дамоўленасці будуць абавязкова выкананы дакладна і ў тэрмін па ўсіх напрамках. «Дзякуй яшчэ раз за тое, што вы прыехалі ў гэты далёкі для вас край, але гэта вельмі блізкая зямля для нас. Любы расійскі рэгіён для нас — вельмі блізкія людзі. Мы з Сахалінам, Уладзівастокам актыўна супрацоўнічаем. Ну а вы, лічыце, на паўдарозе. Таму не так ужо і далёка вы ад нас знаходзіцеся», — рэзюмаваў Аляксандр Лукашэнка.
Айсен Нікалаеў у сваю чаргу адзначыў, што ўпершыню наведвае Беларусь і для яго вялікі гонар сустрэцца асабіста. «Мы вельмі высока цэнім магчымасць развіцця супрацоўніцтва з Беларуссю ў рамках развіцця саюзніцкіх адносін паміж нашымі краінамі. Хачу выказаць шчырую ўдзячнасць вам за вашу працу, пастаянную ўвагу да пытанняў развіцця міжрэгіянальнага супрацоўніцтва», — сказаў ён.
«Вы абсалютна правільна сказалі. Гэтыя заходнія фашысцкія санкцыі зрабілі нас мацнейшымі. Мы, наадварот, сталі развівацца хутчэй. Мы ў апошнія 4 гады расцём тэмпамі каля 7-8 працэнтаў у год. Мы — адзін рэгіёнаў Расіі, які сама хутка расце», — адзначыў кіраўнік рэгіёна.
