«Мы хутка вучыліся і дасягнулі рэзультатаў». Эксперт аб пазіцыях Беларусі ў сусветным экспарце малака
Фота з архіва
11 верасня, Мінск . Італія доўгія гады з’яўляецца для нас прыкладам у пытаннях вытворчасці і перапрацоўкі малака, аднак для нас важна паказаць, што Беларусь вельмі хутка вучыцца і дасягнула дастойных рэзультатаў. Такое меркаванне ў час II Беларуска-італьянскага круглага стала ў галіне тэхналогій перапрацоўкі малака і вытворчасці малочных прадуктаў, які праходзіць з 10 па 13 верасня ў Нацыянальнай акадэміі навук Беларусі, выказаў генеральны дырэктар Навукова-практычнага цэнтра НАН Беларусі па харчаванні Аляксей Меляшчэня,
На долю Беларусі прыпадае 6 працэнтаў сусветнага экспарту малака, што дазваляе краіне ўваходзіць у топ-10 сусветных экспарцёраў малочнай прадукцыі. У той жа час, як заўважыў кіраўнік НПЦ па харчаванні, Італія ўсё яшчэ застаецца вялікім імпарцёрам малочных прадуктаў. «Мы спадзяёмся рэалізоўваць сваю прадукцыю і ў Італію», — адзначыў эксперт.
Пільная ўвага, што ўдзяляецца сёння развіццю вытворчасці малочных прадуктаў, тлумачыцца тым, што апошнія гады тэмпы росту цэн на малочную прадукцыю ў свеце ў сярэднім дасягаюць 25 працэнтаў. Па гэтай прычыне для Беларусі вытворчасць малака і яго перапрацоўка — першарадны прыярытэт. Поспехі, як было заўважана Аляксеем Меляшчэнем, відавочныя.
Сёння Беларусь займае другое месца ў свеце па экспарце згушчанага малака, трэцяе — па экспарце сметанковага масла і сухой сыроваткі, чацвёртае — па экспарце сыру, пятае — па экспарце сухога абястлушчанага малака. «У год рэспубліка вырабляе прыкладна 8 млн т малака, у той час як Італія — прыкладна 14 млн т. Так, па агульных аб’ёмах мы пакуль адстаём, але ў пераразліку на душу насельніцтва ўпэўнена трымаемся ў дзясятцы лідараў, набліжаючыся да паказчыка 820 кг на аднаго жыхара», — дадаў гендырэктар навукова-практычнага цэнтра.
За апошнія 30 гадоў у краіне для развіцця малочнай галіны было зроблена вельмі шмат: значная колькасць інвестыцыйных уліванняў была накіравана на будаўніцтва і мадэрнізацыю малочных ферм, перааснашчэнне і будаўніцтва новых прадпрыемстваў малочнай прамысловасці. Як і ва ўсім свеце, у Беларусі ідзе ўзбуйненне заводаў: калі прыкладна 25 гадоў таму ў рэспубліцы налічвалася звыш 100 малаказаводаў, то сёння функцыянуюць 32 вялікія малочныя холдынгі.
«Узровень самазабяспечанасці Беларусі малаком складае амаль 270 працэнтаў. Дарэчы, у Італіі толькі каля 80 працэнтаў прыпадае на ўласную вытворчасць малочных прадуктаў, — заўважыў Аляксей Меляшчэня. — У 2023 годзе мы прадавалі свае малочныя прадукты ўжо ў 59 краін. Такім чынам, у цэлым мы вырабляем больш за 120 тыс. т масла, 260 тыс. т сыроў, 130 тыс. т сухога абястлушчанага малака і больш за 130 тыс. т сухой малочнай сыроваткі».
Эксперты Беларусі і Італіі ў малочнай прамысловасці сёння абмяркоўваюць шырокі спектр актуальных профільных пытанняў. У іх ліку — перспектывы гандлёвых адносін паміж Італіяй і Беларуссю, айчынная спецыфіка вытворчасці малака і малочнай прадукцыі, перспектывы супрацоўніцтва з арганізацыямі Італіі, а таксама навуковае забеспячэнне малочнай прамысловасці Беларусі, распрацоўкі вучоных як аснова інавацыйнага развіцця малочнай галіны, айчынныя сакрэты ахалоджвання ў малочнай прамысловасці, і гэта далёка не поўны пералік уздымаемых галіновых тэм.
Дарэчы, гэта мерапрыемства ўжо другое па лініі супрацоўніцтва з міжземнаморскай краінай. І Беларуска-італьянскі круглы стол толькі ў галіне жывёлагадоўлі адбыўся ў Мінску 28-29 лютага бягучага года. Было анансавана, што Беларусь і Італія маюць намер падпісаць камюніке аб далейшым супрацоўніцтве на аснове вынікаў двух круглых сталоў.
