Politico: брат Паўла Дурава аб’яўлены ў вышук у Францыі
Фота AP Photo
28 жніўня, Мінск /Кар. БЕЛТА/. Брат Паўла Дурава Мікалай аб’яўлены ў вышук у Францыі. Аб гэтым паведаміла выданне Politico са спасылкай на судовы дакумент.
Як адзначыла выданне, месцазнаходжанне Мікалая Дурава на гэты момант невядома. Улады Францыі выдалі ордары на арышт Паўла Дурава і яго брата Мікалая 25 сакавіка 2024 года. Яны абвінавачваюцца, у прыватнасці, у саўдзеле ў захоўванні, распаўсюджванні або прадастаўленні доступу да парнаграфічных выяў непаўналетніх у складзе арганізаванай групы.
У дакуменце адзначаецца, што ордары былі выдадзены пасля таго, як платформа абмену паведамленнямі не адказала на больш ранні судовы запыт аб ідэнтыфікацыі карыстальніка Telegram. Падкрэсліваецца таксама «практычна поўная адсутнасць супрацоўніцтва Telegram» з французскімі і еўрапейскімі ўладамі ў выпадках іншых запытаў.
У пракуратуры Парыжа ў сваю чаргу заявілі, што розныя правапарушэнні, учыненыя з дапамогай Telegram, якія сталі падставай для пачатку расследавання аддзелам па барацьбе з кіберзлачыннасцю, уключаюць у сябе «правапарушэнні, звязаныя з дзіцячай парнаграфіяй (сярод іншых)».
Заснавальнік Telegram Павел Дураў быў затрыманы ў парыжскім аэрапорце 24 жніўня. Бізнесмену ўвогуле прад’яўлена абвінавачанне ў 12 злачынствах. Паводле даных СМІ, яму можа пагражаць да 20 гадоў турмы.-0-
