Politico: ЕС мае намер аднавіць дыскусіі аб санкцыях супраць РФ пасля старшынства Венгрыі
Фота Unsplash
21 кастрычніка, Мінск /Кар. БЕЛТА/. Еўрасаюз хоча аднавіць дыскусіі аб узмацненні санкцый супраць Расіі ў студзені наступнага года, пасля заканчэння старшынства Венгрыі ў Савеце ЕС, паведамляе выданне Politico.
Паводле слоў еўрапейскіх дыпламатаў і чыноўнікаў, прэм’ер-міністр Венгрыі Віктар Орбан выкарыстаў старшынства сваёй краіны ў Савеце ЕС, каб фактычна спыніць перагаворы аб санкцыях. Цяпер дзяржавы — члены супольнасці разлічваюць на Польшчу, якая будзе старшынстваваць у першай палове 2025 года, каб ажывіць вострыя дыскусіі.
Як указвае выданне, Варшава ўжо дала зразумець, што хоча выкарыстоўваць сваё шасцімесячнае старшынства, каб зрабіць больш жорсткім кантроль над імпартам расійскага паліва ў ЕС.
Раней міністр у пытаннях клімату і навакольнага асяроддзя Польшчы Кшыштаф Балеста заявіў, што імпарт расійскіх энэрганосьбітаў у еўрапейскія краіны расце, нягледзячы на тое, што ЕС уводзіў абмежаванні на расійскую нафту і значна скараціў закупкі трубаправоднага газу.
«Нам трэба прызнаць, што рэжым санкцый не працуе так, як павінен — ёсць праблемы са звадкаваным прыродным газам (ЗПГ), ёсць праблемы з нафтай, ёсць праблемы з пэўнымі таварамі», — адзначыў адзін з еўрапейскіх дыпламатаў.
У дакуменце, з якім азнаёмілася выданне, змяшчаецца заклік да больш строгай праверкі паходжання газу, які паступае ў блок, для забеспячэння адсочвання. Мяркуецца, што гэта прапанова будзе разглядацца ў студзені ў рамках польскага старшынства.
Эканаміст і эксперт у санкцыях Міжнароднага інстытута стратэгічных даследаванняў Марыя Шагіна лічыць, што польскае старшынства «прадастаўляе добрую магчымасць» для таго, каб блок перагледзеў сваю стратэгію санкцый, палепшыць іх распрацоўку і прымяненне. Паводле яе слоў, хутчэй за ўсё, будзе абмяркоўвацца і пытанне аб узмацненні кантролю над паступаемым ЗПГ, паколькі «акрамя ЗПГ засталося мала буйных санкцый», на якія можна было б нацэліцца». Чакаецца, што будучыя пакеты санкцый будуць накіраваны на тое, каб не дапусціць абход існуючых абмежаванняў.
Тым не менш любыя новыя санкцыі павінны будуць пераадолець супраціўленне Венгрыі, якая ўжо не раз выкарыстала сваё права вета, каб змякчыць, спыніць або заблакіраваць антырасійскія санкцыі.-0-
