Рэзідэнты краін ШАС амаль у 4 разы павялічылі аб’ёмы біржавога гандлю на БУТБ
Фота з архіва
4 ліпеня, Мінск . Рэзідэнты краін Шанхайскай арганізацыі супрацоўніцтва амаль у 4 разы павялічылі аб’ёмы біржавога гандлю на Беларускай універсальнай таварнай біржы, паведамілі ў прэс-службе БУТБ.
За першае паўгоддзе 2024 года сума здзелак удзельнікаў біржавых таргоў з дзяржаў — партнёраў Беларусі па ШАС дасягнула $555,1 млн, што ў 3,7 раза больш, чым у студзені-чэрвені 2023 года. Пры гэтым прыкметна вырасла і колькасць акрэдытаваных на БУТБ рэзідэнтаў краін ШАС — з 4023 у студзені 2024 года да 4412 у ліпені 2024 года.
У структуры біржавога тавараабароту гэтых краін з Беларуссю пераважала прадукцыя сельскай гаспадаркі і лясной прамысловасці. Удзельная вага гэтых таварных груп у агульным аб’ёме здзелак, заключаных кампаніямі з краін ШАС на БУТБ, склала 61 працэнт і 23 працэнты адпаведна.
«Сёння на біржы прадстаўлены ўсе дзяржавы — удзельніцы ШАС. Прычым гэта не толькі кампаніі з гэтых краін, але і выпускаемая імі прадукцыя. У бягучым годзе найбольш актыўна біржавы механізм выкарыстоўваўся рэзідэнтамі Расіі, Кітая, Узбекістана і Казахстана. На гэтыя краіны прыпала звыш 95 працэнтаў сукупнага тавараабароту ШАС на біржавой пляцоўцы. Больш таго, усе яны выйшлі ў плюс па суме біржавых кантрактаў у параўнанні з першым паўгоддзем мінулага года. У прыватнасці, кітайскія ўдзельнікі таргоў нарасцілі аб’ёмы здзелак у 3 разы, расійскія і казахстанскія — у 4 разы, а ўзбекістанскія — у 5 разоў», — адзначылі ў прэс-службе.
Што датычыцца самых запатрабаваных беларускіх тавараў на гэтых рынках, то тут назіраецца пэўная спецыялізацыя. Напрыклад, у Расію праз біржу ў асноўным рэалізуецца мяса-малочная прадукцыя, кармавыя дабаўкі, газасілікатныя блокі і піламатэрыялы. У сваю чаргу Кітай быў і застаецца буйнейшым пакупніком беларускай пілапрадукцыі, нягледзячы на тое што з году ў год наменклатура тавараў, што набываюцца кітайскімі трэйдарамі на біржавых таргах, паступова пашыраецца. А ва Узбекістан у гэтым годзе пастаўляліся толькі піламатэрыялы, хоць у мінулым годзе таксама рэгістраваліся здзелкі па куплі цукру і нафтахімічнай прадукцыі. Казахстан жа ў 2024 годзе сканцэнтраваўся на імпарце цукру і выйшаў на першае месца па гэтым паказчыку, закупіўшы ў Беларусі больш за 29 тыс. т гэтай прадукцыі.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Галоўная функцыя біржы — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
Па стане на 1 ліпеня 2024 года на БУТБ былі акрэдытаваны 33 915 суб’ектаў гаспадарання, у тым ліку 7319 нерэзідэнтаў Беларусі з 71 краіны.
