У Мінску стартаваў беларуска-ўзбекскі турыстычны форум
Фота Нацыянальнага агенцтва па турызме
12 верасня, Мінск . Беларуска-ўзбекскі турыстычны форум стартаваў у Мінску, паведамілі БЕЛТА ў Нацыянальным агенцтве па турызме.
Сёння ў Нацыянальным аэрапорце Мінск традыцыйным беларускім караваем сустрэлі замежных гасцей. У час візіту яны наведаюць славутасці Беларусі, азнаёмяцца з турыстычным патэнцыялам краіны, а таксама прымуць удзел у пленарным пасяджэнні.
Бакі абмяркуюць стан і перспектывы супрацоўніцтва ў сферы турызму, узаемадзеянне Беларускага дзяржаўнага ўніверсітэта фізічнай культуры і Міжнароднага ўніверсітэта турызму і культурнай спадчыны «Шаўковы шлях» па падрыхтоўцы кадраў, развіццё турыстычнага прадукту і інш.
Узаемадзеянне на ўсіх узроўнях у сферы турызму паміж Рэспублікай Беларусь і Рэспублікай Узбекістан значна ўзрасло. Наладжаны авіяцыйныя зносіны, якія ажыццяўляюць кампаніі «Узбекскія авіялініі» і «Белавія» 5 разоў у тыдзень (усе дні, акрамя серады і нядзелі). У 2023 годзе Беларусь наведалі больш за 32,7 тыс. грамадзян Узбекістана, што ў 1,4 раза больш, чым у 2022 годзе, і ў 1,6 раза больш, чым у дапандэмійным 2019 годзе. За аналагічны перыяд сярэдняя працягласць знаходжання замежных турыстаў з Узбекістана ў Беларусі павялічылася з 3 да 4 дзён.
Форум — пятае сумеснае мерапрыемства дзелавых колаў Беларусі і Узбекістана ў бягучым годзе: у лютым прайшоў ІІ Форум рэгіёнаў Беларусі і Узбекістана, у красавіку ўзбекская дэлегацыя прыняла ўдзел у міжнародным вясеннім кірмашы турыстычных паслуг «Адпачынак». У маі для тураператараў Узбекістана быў арганізаваны азнаямленчы тур у Беларусь, у жніўні адбыўся ІІ Узбекска-беларускі жаночы бізнес-форум, на якіх абмяркоўваліся пытанні развіцця эканамічных кантактаў паміж краінамі.
