Швед пракаменціраваў рашэнне аб памілаванні 30 асуджаных за злачынствы пратэснай накіраванасці
Андрэй Швед. Фота з архіва
4 верасня, Мінск . Генеральны пракурор Беларусі Андрэй Швед пракаменціраваў рашэнне Прэзідэнта аб памілаванні 30 асоб, асуджаных за злачынствы пратэснай накіраванасці,
«Кіраўніком дзяржавы было даручана спецыялізаванай камісіі, якая прызначана садзейнічаць вяртанню грамадзян на Радзіму, разгледзець заявы аб памілаванні грамадзян, якія адбываюць пакаранне за ўчыненне экстрэмісцкіх злачынстваў. Пасяджэнню камісіі папярэднічала сур’ёзная работа, былі вывучаны ўсе існуючыя матэрыялы, у тым ліку крымінальных спраў, матэрыялы, звязаныя з паводзінамі ў месцах пазбаўлення волі гэтых асоб», — сказаў Андрэй Швед.
Паводле яго слоў, члены камісіі ўлічвалі і іншыя абставіны: узрост, чыстасардэчнае раскаянне, запэўненні гэтых асоб, што яны будуць у далейшым няўхільна выконваць законы краіны, стан здароўя і іншыя акалічнасці. «Пры гэтым мы ўлічылі таксама той факт, што гэтыя асобы не ўчынялі насільныя злачынствы супраць прадстаўнікоў улады. Яны былі асуджаны ў асноўным за знявагу і паклёп у інтэрнэт-прасторы», — адзначыў генпракурор.
Члены камісіі, а гэта прадстаўнікі не толькі дзяржаўных органаў, але і сродкаў масавай інфармацыі, грамадскіх аб’яднанняў, абмяркоўвалі кожную кандыдатуру, дадаў ён. «Дыскусія была даволі вострая. Галасавалі адкрыта», — сказаў Андрэй Швед, дадаўшы, што ў некаторых выпадках рашэнні на карысць заяўнікаў прымаліся з перавагай у 1-2 галасы, не больш.
Па выніках пасяджэння камісіі было прынята рашэнне, што мэтазгодна звярнуцца да кіраўніка дзяржавы з пытаннем аб тым, што гэтыя людзі (размова ішла пра 30) могуць быць вызвалены ад далейшага адбыцця пакарання. «Кіраўнік дзяржавы, згадзіўшыся з меркаваннем членаў камісіі, прыняў акт аб памілаванні, кіруючыся прынцыпамі гуманізму. Па сутнасці, гэта акт добрай волі», — падкрэсліў генпракурор.
Разам з тым гэтыя людзі пасля таго, як іх вызваляць з месцаў пазбаўлення волі, будуць знаходзіцца пад кантролем органаў унутраных спраў.
