Выставу «Падарожжа па Венесуэле» прадставяць у Лошыцкай сядзібе 12 верасня
Фота з архіва
10 верасня, Мінск . Выставу фатаграфій, рамесных вырабаў і народнага адзення «Падарожжа па Венесуэле» прадставяць у Лошыцкай сядзібе — філіяле Музея гісторыі горада Мінска — 12 верасня, паведамілі БЕЛТА ва ўстанове культуры.
Выстава арганізавана Пасольствам Баліварыянскай Рэспублікі Венесуэла ў Беларусі сумесна з Лацінаамерыканскім культурным цэнтрам імя Сімона Балівара. У экспазіцыі прадстаўлены фатаграфіі «Славутасці Венесуэлы» з адлюстраваннем маляўнічых пейзажаў: пляжы архіпелага Лос-Рокес, трапічны лес з самым высокім у свеце вадаспадам Анхель, саваны, горныя масівы венесуэльскіх Кардыльераў і Андаў.
Таксама на выставе дэманструюцца рамесныя вырабы карэнных народаў Венесуэлы. Візітная картка гэтай краіны — гамакі-чынчора са сцябла кукурузы, пальмавага лісця, суравых баваўняных нітак. Прадстаўлены традыцыйныя венесуэльскія музычныя інструменты — вядомыя маракасы, унікальныя гітара куатра і арфа. Яркім дапаўненнем экспазіцыі з’яўляюцца нацыянальныя касцюмы для традыцыйных венесуэльскіх свят — каларытнага карнавалу ў горадзе Эль Кальяа, фестывалю ў горадзе Сан-Хуан-Баўтыста (востраў Маргарыта), знакамітага абраду «танцуючых д’яблаў» і іншых праяў, абвешчаных ЮНЕСКА нематэрыяльнай культурнай спадчынай чалавецтва.
Дадатковую інфармацыю можна атрымаць па тэлефоне 80 (017) 396 18 86, праз электронную пошту loshytsa@minskmuseum.by або сацыяльныя сеткі музея ВКонтакте, Facebook і Instagram (/loshytsamuseum).
