Намеснік кіраўніка МЗС Беларусі і Пасол Пакістана прынялі ўдзел у гашэнні паштовай маркі да 30-годдзя дыпадносін
Фота МЗС
4 сакавіка, Мінск . Намеснік міністра замежных спраў Рэспублікі Беларусь Яўген Шэстакоў 4 сакавіка прыняў удзел у цырымоніі гашэння памятнай паштовай маркі з выпадку 30-годдзя ўстанаўлення дыпламатычных адносін паміж Беларуссю і Пакістанам. Аб гэтым паведамілі ў прэс-службе беларускага знешнепалітычнага ведамства.
Паштовы праект, на якім паказаны архітэктурна-скульптурны комплекс «Мінск — Горад-герой» (Мінск, Беларусь) і мінарэт «Мінар-э-Пакістан» (Лахор, Пакістан), быў падрыхтаваны Міністэрствам сувязі і інфарматызацыі Рэспублікі Беларусь і выдавецкім цэнтрам «Марка» РУП «Белпошта» сумесна з пасольствам Беларусі ў Пакістане.
У мерапрыемстве прынялі ўдзел Надзвычайны і Паўнамоцны Пасол Ісламскай Рэспублікі Пакістан Саджад Хайдэр Хан і намеснік міністра сувязі і інфарматызацыі Рэспублікі Беларусь Ганна Рабава.
У сваім прывітальным слове Яўген Шэстакоў падкрэсліў традыцыйна дружалюбны і канструктыўны характар адносін Беларусі і Пакістана, адзначыў дасягнутыя за апошнія тры дзесяцігоддзі вынікі сумеснай работы ў палітычнай, гандлёва-эканамічнай і гуманітарнай галінах, а таксама ў рамках міжнародных арганізацый.
Бакі канстатавалі наяўнасць істотнага патэнцыялу для далейшага дынамічнага прадаўжэння беларуска-пакістанскага дыялогу і вывядзення двухбаковых адносін на якасна новы ўзровень.
