Савет ЕЭК спрасціў працэдуру пацвярджэння паходжання тавараў
26 студзеня, Масква /Эдуард Півавар . Савет
Еўразійскай эканамічнай камісіі на пасяджэнні 26 студзеня прыняў рашэнне
скарэкціраваць непрэферэнцыйныя правілы вызначэння паходжання тавараў, якія
ўвозяцца на мытную тэрыторыю Еўразійскага эканамічнага саюза. Аб гэтым
паведамілі ў гандлёвым блоку ЕЭК.
«Пакет комплексных паправак прадугледжвае
ўдасканаленне парадку дакументальнага пацвярджэння паходжання тавараў,
спрашчэнне патрабаванняў да афармлення адпаведных сертыфікатаў, канкрэтызацыю
палажэнняў аб адміністрацыйным супрацоўніцтве з трэцімі краінамі, а таксама
шэраг іншых змяненняў, падрыхтаваных з улікам існуючай правапрымяняльнай
практыкі», — растлумачылі ў ЕЭК.
У прыватнасці, на пастаяннай аснове замацоўваецца
магчымасць пацвярджаць паходжанне тавараў, якія патэнцыяльна падпадаюць пад
дзеючыя ў ЕАЭС меры абароны ўнутранага рынку, дэкларацыяй аб паходжанні тавару
(замест сертыфіката), калі агульны мытны кошт партыі такіх тавараў не перавышае
суму, эквівалентную 1,5 тыс. еўра. Раней, пачынаючы з красавіка 2022 года,
такая магчымасць устанаўлівалася ў ЕАЭС у якасці адной з мер па павышэнні
ўстойлівасці эканомік дзяржаў-членаў і мела часовы характар.
«Прынятае рашэнне дасць магчымасць імпарцёрам
захаваць прывычны парадак работы са знешнегандлёвымі дакументамі, звязанымі з
непрэферэнцыйным паходжаннем. Акрамя таго, яно накіравана на адаптацыю правіл,
што прымяняюцца ў саюзе, да сучасных умоў гандлю і мінімізацыю існуючых
цяжкасцей з пацвярджэннем паходжання прадукцыі, якая ўвозіцца на мытную
тэрыторыю ЕАЭС», — пракаменціраваў рашэнне член Калегіі (міністр) па
гандлі ЕЭК Андрэй Сляпнёў.
Правілы вызначэння паходжання тавараў, якія
ўвозяцца на мытную тэрыторыю ЕАЭС (непрэферэнцыйныя правілы вызначэння
паходжання тавараў), зацверджаны рашэннем Савета ЕЭК ад 13 ліпеня 2018 года і
выкарыстоўваюцца ў дзяржавах — членах саюза з 12 студзеня 2019 года для
прымянення мер нетарыфнага рэгулявання і абароны ўнутранага рынку, таксама ў
іншых выпадках, прадугледжаных Дагаворам аб ЕАЭС.
Беларусь на пасяджэнні Савета ЕЭК прадстаўляў
віцэ-прэм’ер Ігар Петрышэнка.
