Бясплатную кансультацыю прафсаюзных юрыстаў можна будзе атрымаць 21 снежня ва ўсіх рэгіёнах краіны
Фота з архіва
20 снежня, Мінск . Бясплатную кансультацыю прафсаюзных юрыстаў можна будзе атрымаць 21 снежня ва ўсіх рэгіёнах краіны. Аб гэтым БЕЛТА паведамілі ў прэс-службе Федэрацыі прафсаюзаў Беларусі.
Больш як сотня юрыстаў Федэрацыі прафсаюзаў раз’едзецца па рэгіёнах Беларусі, каб аказаць кваліфікаваную прававую дапамогу грамадзянам непасрэдна ў арганізацыях і на прадпрыемствах і на тэрыторыі раённых, гарадскіх аб’яднанняў прафсаюзаў. Юрысты ФПБ пракансультуюць усіх жадаючых па пытаннях, звязаных з абаронай працоўных правоў і сацыяльна-эканамічных інтарэсаў.
Уся неабходная інфармацыя аб месцы і часе правядзення прыёмаў знаходзіцца на афіцыйных сайтах абласных, раённых, гарадскіх аб’яднанняў прафсаюзаў.
«Выязныя прававыя прыёмы — адна з форм кансультавання грамадзян. Яна вельмі запатрабавана ў людзей, таму што такая практыка дае магчымасць больш аператыўна вырашаць праблемы тых, хто звярнуўся. У большасці выпадкаў пытанні вырашаюцца непасрэдна на прававым прыёме. Часцей за ўсё дастаткова растлумачэння норм заканадаўства. У неабходных выпадках складаюцца працэсуальныя дакументы і аказваецца дапамога ў падрыхтоўцы зваротаў у адпаведныя службы і дзяржорганы. У кожным выпадку прафсаюзныя юрысты даводзяць усё да лагічнага завяршэння, — расказалі ў прэс-службе Федэрацыі прафсаюзаў. — З пачатку года на прыём звярнуліся звыш 4500 чалавек. У большасці выпадкаў звароты закраналі працоўную дзейнасць. Гэта пытанні, якія датычацца аплаты працы, правамернасці звальнення, выплаты матэрыяльнай дапамогі і інш. Трэба дадаць, што ў час прававых прыёмаў да прафсаюзных юрыстаў далучаюцца і пракурорскія работнікі. Пад асаблівай увагай двух ведамстваў — выкананне наймальнікамі гарантый у галіне працы, парадку і тэрмінаў выплаты заработнай платы, а таксама ўсіх сум, якія належаць работніку пры звальненні».
Таксама адначасова з прававымі прыёмамі ў працоўных калектывах праводзяцца дні прававой асветы і прававой культуры, у час якіх работнікам на прадпрыемствах тлумачаць найбольш актуальныя прававыя пытанні.
Акрамя выязных прыёмаў, прававыя інспектары працы на пастаяннай аснове аказваюць юрыдычную дапамогу грамадзянам. Звярнуцца можна па тэлефоне, прыйсці на асабісты прыём, пакінуць пісьмовы зварот або электронны — праз спецыяльны сэрвіс на інтэрнэт-партале ФПБ.
