Масква заклікае Баку і Ерэван да стрыманасці
Дзмітрый Пяскоў. Фота ТАСС
13 лютага, Мінск /Кар. БЕЛТА/. Масква заклікае Азербайджан і Арменію да стрыманасці ў сувязі з нядаўнім абвастрэннем сітуацыі і выказвае надзею, што працэс падрыхтоўкі мірнага дагавора прадоўжыцца. Аб гэтым заявіў прэс-сакратар расійскага лідара Дзмітрый Пяскоў, перадае ТАСС.
Афіцыйны прадстаўнік Крамля ўказаў, што з лініі сутыкнення Азербайджана і Арменіі паступаюць «трывожныя навіны». Аднак Масква заклікае гэтыя краіны да стрыманасці, а таксама просіць «пастарацца пазбягаць любых дзеянняў, якія другі бок можа палічыць як правакацыйныя». У РФ прадоўжаць кантакты з абодвума бакамі.
Паводле слоў Пяскова, нядаўнія падзеі як мінімум не садзейнічаюць падтрыманню працэсу падрыхтоўкі мірнага дагавора і набліжэнню да моманту яго падпісання.
Раней дзяржаўнае інфармагенцтва Азербайджана АЗЕРТАДЖ са спасылкай на Дзяржпагранслужбу рэспублікі паведаміла, што азербайджанскі пагранічнік быў паранены ў выніку абстрэлу з тэрыторыі Арменіі. У далейшым Баку і Ерэван абмяняліся ўзаемнымі абвінавачваннямі ў абстрэлах сваіх пазіцый на граніцы. У Мінабароны Арменіі сёння заявілі аб чатырох загінулых і адным пацярпелым з-за абстрэлу Азербайджана. МЗС Азербайджана заявіла аб прыхільнасці Баку да мірнага працэсу з Арменіяй, заклікаўшы Ерэван пазбягаць ваеннай эскалацыі.-0-
