Барэль: ЕС у спробах вызваліцца ад энергазалежнасці ад РФ памяняў адну залежнасць на другую
Жазэп Барэль. Фота прэс-службы МЗС РФ/ТАСС
20 снежня, Мінск /Кар. БЕЛТА/. Кіраўнік еўрапейскай дыпламатыі Жазэп Барэль прызнаў, што Еўрасаюз, імкнучыся вызваліцца ад энергетычнай залежнасці ад Расіі, у выніку памяняў адну залежнасць на другую, паведамляе РІА Навіны.
«Мы гэта зрабілі, хоць мы за гэта, вядома, заплацілі сваю эканамічную цану. Магчыма, мы замянілі адну залежнасць на другую, але мы, тым не менш, вызваліліся ад энергетычнай залежнасці ад Расіі», — сказаў Барэль.
У той жа час расійскі бок не раз указваў на тое, што адмова Захаду ад набыцця вуглевадародаў у Расіі стала сур’ёзнай памылкай, паколькі пасля гэтага ён трапіў у яшчэ больш моцную залежнасць, абумоўленую высокімі цэнамі.
Акрамя таго, у сваёй заяве Барэль усумніўся ў магчымасці прадаўжэння дапамогі ЕС Украіне. «Ці прадоўжыцца адзінства ЕС у гэтым пытанні, ці прадоўжыцца дапамога ад ЗША пры новым прэзідэнце і нават да яго выбараў?» — задаўся пытаннем дыпламат. Ён таксама ўказаў на тое, што для еўрапейцаў важна, хто пераможа на прэзідэнцкіх выбарах у ЗША ў 2024 годзе.-0-
