Мінкультуры аб’явіла конкурс канцэпцый цырымоній адкрыцця і закрыцця «Лістапада» ў 2024 годзе
Фота з архіва
19 снежня, Мінск . Міністэрства культуры аб’явіла конкурсны адбор рэжысёрскіх канцэпцый цырымоній адкрыцця і закрыцця ХХХ Мінскага міжнароднага кінафестывалю «Лістапад». Аб гэтым паведамілі БЕЛТА ў прэс-службе Мінкультуры.
Кінафестываль пройдзе з 1 па 8 лістапада 2024 года. Прапануемы слоган цырымоній — «Кіно са знакам якасці». Да ўдзелу ў адборы запрашаюцца рэжысёры-пастаноўшчыкі тэатральна-відовішчных арганізацый і арганізацый культуры, студэнты і навучэнцы ўстаноў адукацыі ў сферы культуры, якія вучацца па спецыяльнасцях «рэжысура тэатра», «рэжысура свят», «мастацтва эстрады (рэжысура)» і блізкіх спецыяльнасцях, а таксама іншыя асобы, якія маюць вопыт правядзення культурных мерапрыемстваў.
Цырымонія адкрыцця павінна адлюстроўваць тэмы 30-годдзя кінафестывалю і 100-годдзя беларускага кіно, а канцэпцыя ў цэлым уяўляць сабой складны выклад сюжэтнай лініі мерапрыемства з вылучэннем асобных эпізодаў, раздзелаў, блокаў, мастацкага афармлення сцэнічнай прасторы, пералікам мяркуемага складу творчых калектываў і выканаўцаў і магчымасці іх рэпертуару.
Матэрыялы трэба прадаставіць на электронную пошту 1zam@kultura.by да 10 студзеня 2024 года. Кансультацыю можна атрымаць па тэлефоне: (8017) 203 25 59.
