Ва Украіне падпісаны закон аб статусе англійскай як мовы міжнародных зносін
Фота unsplash
26 чэрвеня, Мінск /Кар. БЕЛТА/. Ва Украіне падпісаны закон аб статусе англійскай як мовы міжнародных зносін. Аб гэтым паведамляе ТАСС.
Згодна з інфармацыяй, якая размешчана на сайце Вярхоўнай рады Украіны, закон вернуты з подпісам Уладзіміра Зяленскага. Аб падпісанні закона піша таксама выданне «Страна».
У дакуменце ў тым ліку пералічаны катэгорыі дзяржаўных пасад, кандыдаты на якія абавязаны валодаць англійскай мовай.
Закон быў прыняты Вярхоўнай радай Украіны ў другім чытанні 4 чэрвеня 2024 года. Тады народны дэпутат Украіны Яўгенія Краўчук адзначала, што валоданне англійскай мовай будзе абавязковым, у прыватнасці, для кіраўнікоў мясцовых адміністрацый і іх намеснікаў, супрацоўнікаў пракуратуры, старшага і сярэдняга кіруючага складу Нацпаліцыі, падатковых і мытных органаў. Пры гэтым для дзяржслужачых прадугледжаны надбаўкі 10 працэнтаў да акладу за валоданне англійскай на ўзроўні В2 і вышэйшым. Адзначалася, што з верасня 2026 года англійская мова будзе выкарыстоўвацца «для навучання ў садах і іншых дашкольных установах для дзяцей». Акрамя таго, праз два гады пасля ўступлення закона ў сілу ўлады павінны забяспечыць дубліраванне інфармацыі на англійскай мове на вакзалах, аўтавакзалах, у аэрапортах і ў некаторых відах транспарту.
Законапраект аб статусе англійскай мовы быў унесены ў Вярхоўную раду Украіны Зяленскім летам 2023 года. Ён вызначыў дакумент як неадкладны, ужо ў лістападзе Рада прыняла яго ў першым чытанні. Пры гэтым закон неаднаразова крытыкаваўся, супраць яго прыняцця было зарэгістравана некалькі петыцый.-0-
