Узнагароду атрымае кожны. Турнір «Спешыял Алімпікс» па водных відах спорту праходзіць у Мінску
23 лютага, Мінск . Рэспубліканскі турнір «Спешыял Алімпікс» па водных відах спорту праходзіць сёння ў Мінску. У спаборніцтвах прымаюць удзел спартсмены са спецыяльных дамоў-інтэрнатаў і школ-інтэрнатаў для асоб з асаблівасцямі развіцця. Турнір праходзіць пры падтрымцы Прэзідэнцкага спартыўнага клуба,
Як расказала выканаўчы дырэктар Беларускага камітэта «Спешыял Алімпікс» Ларыса Таболіна, у спаборніцтвах удзельнічаюць 12 каманд з розных куткоў Беларусі. Усяго стартавыя пратаколы налічваюць некалькі дзясяткаў прозвішчаў — як хлопцаў, так і дзяўчат.
«Вельмі важна, што старты накіраваны не толькі на развіццё і ўдасканаленне спаборніцкіх, спартыўных магчымасцей, але і на паляпшэнне іх якасці жыцця. Таму што плаванне само па сабе мае вялікі эмацыянальны зарад і зберагальны эфект для здароўя ўдзельніка. Важна і тое, што судзейскі корпус прадстаўлены на самым высокім узроўні. Вялікі дзякуй валанцёрам, усім тым, хто дапамагае з арганізацыяй і правядзеннем мерапрыемства», — адзначыла прадстаўнік камітэта.
Спаборніцтвы праходзяць ужо дзявяты год на базе сталічнага спартыўнага комплексу «Трактар». Спартсмены спаборнічаюць у чатырох дысцыплінах: 25 і 50 метраў вольным стылем, 25 метраў на спіне, а таксама ў змешанай эстафеце.
«Нашы ўдзельнікі рыхтуюцца да стартаў загадзя. Яны трэніруюцца ў басейнах на базе сваіх устаноў альбо ў іншых бліжэйшых комплексах. Спартсмены адточваюць навыкі на працягу года. З-за пэўных асаблівасцей ім неабходна пастаянна займацца, падтрымліваць баявы дух і загартоўку. Яны да гэтага ішлі даўно. Напэўна, пачынаючы яшчэ з навагодніх свят, яны актыўна цікавіліся датай стартаў», — расказала Ларыса Таболіна.
У гэтым годзе правядзенне спаборніцтваў супала з Днём абаронцаў Айчыны. «Таму ў нас сёння двайное свята. З задавальненнем павіншавалі нашых удзельнікаў і трэнераў», — дадала Ларыса Таболіна.
Пераможцы і прызёры спаборніцтваў атрымаюць медалі. Тых, хто заняў чацвёртае і ніжэйшае месца, адзначаць спецыяльнай узнагароднай стужкай. Усе ўдзельнікі стартаў стануць уладальнікамі памятных і каштоўных прызоў. «Галоўны прынцып спаборніцтваў пад эгідай «Спешыял Алімпікс» заключаецца ў тым, каб быў узнагароджаны кожны ўдзельнік. Таксама дзеці атрымаюць дыпломы, у якіх пазначана занятае месца і затрачаны на пераадоленне дыстанцыі час. Безумоўна, не абыдзецца без падарункаў. Кожны ўдзельнік, трэнер і валанцёр атрымае прызы ад нашага камітэта і Прэзідэнцкага спартыўнага клуба», — адзначыла прадстаўнік камітэта.
Дарэчы, гэта далёка не адзіны турнір пад эгідай «Спешыял Алімпікс», запланаваны да правядзення ў 2024 годзе. «Вясной стартуе традыцыйны рэспубліканскі турнір па футболе. Запланаваны і іншыя старты», — рэзюмавала Ларыса Таболіна.
Фота Раміля Насібуліна
