Вызначаны 64 пераможцы для занясення на Рэспубліканскую дошку Гонару | Навіны Беларусі | Беларускія навіны | Беларусь — афіцыйныя навіны | Мінск | БелТА
Фота з архіва
24 красавіка, Мінск . Прэзідэнт Беларусі Аляксандр Лукашэнка 24 красавіка падпісаў указ нумар 174 «Аб занясенні на Рэспубліканскую дошку Гонару пераможцаў спаборніцтва за 2023 год». Аб гэтым паведамілі ў прэс-службе беларускага лідара.
Указам вызначаны 64 пераможцы з ліку рэгіёнаў і арганізацый, якія ўдастоены занясення на Рэспубліканскую дошку Гонару за дасягненне высокіх вынікаў у сферы сацыяльна-эканамічнага развіцця па выніках работы за 2023 год.
У іх ліку 11 адміністрацыйна-тэрытарыяльных адзінак: Брэсцкая і Мінская вобласці, г. Мінск, Баранавіцкі і Камянецкі раёны Брэсцкай вобласці, Астравецкі раён Гродзенскай вобласці, Нясвіжскі і Салігорскі раёны Мінскай вобласці, Ленінскі раён г. Брэста, Маскоўскі і Цэнтральны раёны г. Мінска.
На Рэспубліканскую дошку Гонару таксама будуць занесены 11 арганізацый прамысловасці; тры арганізацыі, якія ажыццяўляюць дзейнасць у будаўніцтве; дзевяць арганізацый сельскай і рыбнай гаспадаркі; дзве арганізацыі лясной гаспадаркі; 28 арганізацый сферы паслуг (арганізацыі гандлю, адукацыі, аховы здароўя, навукі, культуры, сацыяльнага абслугоўвання і іншыя).
Занясенне на Рэспубліканскую дошку Гонару з’яўляецца грамадскім прызнаннем важкага ўкладу рэгіёнаў і калектываў прадпрыемстваў у сацыяльна-эканамічнае развіццё і рост дабрабыту краіны, што з’яўляецца стымулюючым фактарам для дасягнення яшчэ больш высокіх вынікаў у будучым.
