Юныя беларускія фехтавальшчыкі выйгралі сем медалёў на турніры ў Смаленску
Фота з архіва
7 сакавіка, Мінск . У Смаленску завяршыліся Усерасійскія спаборніцтвы па фехтаванні памяці Аляксандра Паўлава з удзелам беларускіх спартсменаў,
За ўзнагароды турніру змагаліся шпажысты і рапірысты ў дзвюх узроставых катэгорыях — да 15 і да 18 гадоў. У спаборніцтвах рапірыстаў у малодшай групе мацнейшым сярод 76 удзельнікаў стаў наш Цімафей Яроменка, які ў вырашальным паядынку ўзяў верх над Міхаілам Ягоравым з Падмаскоўя (12:10). У камандным заліку першае месца таксама занялі нашы хлопцы (Аляксей Лаўнікаў, Цімафей Яроменка і Дзяніс Маслаў), якія абыгралі ў фінале сапернікаў з маскоўскага ЦСКА (36:26). У старэйшай групе бронзавым прызёрам асабістага турніру стаў Мацвей Ермаліцкі, у спаборніцтвах мужчынскіх каманд беларуская зборная выйграла серабро, а дзяўчаты — бронзу.
У індывідуальным заліку сярод шпажыстак да 18 гадоў на другую прыступку п’едэстала паднялася наша Агата Царкова. Адолець беларуску ў фінале змагла толькі масквічка Астасся Чарэдзінцава (15:13), усяго ў гэтым відзе праграмы выступілі 80 дзяўчат.
У камандных спаборніцтвах у хлопцаў старэйшай групы роўных не было нашым Мікіце Булгакаву, Цімафею Куляшову, Паўлу Собалеву і Раману Заніну. Такім чынам, беларуская дэлегацыя вязе са Смаленска тры залатыя, дзве сярэбраныя і дзве бронзавыя ўзнагароды.
