Акуловіч пра малавядомыя факты з гісторыі БЕЛТА: і Марк Шагал меў адносіны да інфармагенцтва
Скрыншот відэа АНТ
28 снежня, Мінск . У праграме «Маркаў. Нічога асабістага» на тэлеканале АНТ генеральны дырэктар БЕЛТА Ірына Акуловіч расказала пра малавядомыя факты са 105-гадовай гісторыі інфармацыйнага агенцтва, .
«Давайце пачнём з Марка Шагала. Калі разабрацца, то нават Марк Шагал меў дачыненне да інфармацыйнага агенцтва. БЕЛТА ж узнікла 23 снежня 1918 года — на тыдзень раней, чым БССР. Таму што БЕЛТА — гэта, на самай справе, дзіця ТАСС. Інакш кажучы, дзіця вялікага інфармацыйнага агенцтва. Яно ўзнікла на вуліцы Захар’еўскай, 41, у кватэры нумар 6. Мы зрабілі кнігу да 105-годдзя БЕЛТА, і я чытала яе з асаблівым хваляваннем. Атрымліваеш сілы, калі чытаеш, як гэта было», — сказала Ірына Акуловіч.
Першапачаткова агенцтва тулілася ў кватэры і яго кіраўнік змагаўся за адну з дзвюх пішучых машынак, якую спрабаваў забраць Саўнаркам. «Ёсць папера, дзе напісана, што калі забяруць машынку, гэта фактычна паралізуе работу агенцтва. Тэлеграфны апарат, які каштаваў вялізных грошай, стаяў у звычайнай кватэры, там бегалі дзеці. Любы рух — і апарата няма, і даныя з Масквы ўжо не атрымаеш», — падкрэсліла Ірына Акуловіч.
Гендырэктар БЕЛТА таксама нагадала пра голад, які быў у тыя гады, і расказала пра спробы выбіць пайкі для супрацоўнікаў агенцтва: «Я чытала дакумент, дзе кіраўнік агенцтва пісаў, што хацеў бы атрымаць хаця б бульбы, мукі і — увага — два кілаграмы мяса на ўсё агенцтва ў месяц. Вось што яны праходзілі». Ірына Акуловіч расказала, як у час Вялікай Айчыннай вайны карэспандэнты агенцтва неслі фатаграфіі за сотні кіламетраў пяшком, каб перадаць іх у цэнтр.
Вяртаючыся да Марка Шагала, гендырэктар БЕЛТА адзначыла, што гэта вельмі цікавая гісторыя. «На самай справе, агенцтва ўзнікла ў Мінску, але ж гэта быў прыфрантавы горад. Палякі наступалі, і яно праіснавала літаральна пару месяцаў, а да нармальнай работы вярнулася толькі праз пару гадоў. Але Віцебск быў горадам усходнім і там адкрылася агенцтва ВіцРОСТА — гэта значыць Віцебскае аддзяленне Расійскага тэлеграфнага агенцтва», — расказала Ірына Акуловіч.
Паводле слоў гендырэктара БЕЛТА, кіраўнік ВіцРОСТА сябраваў з Маркам Шагалам, а сам Віцебск стаў своеасаблівай пляцоўкай, дзе кіпела інфармацыйная работа. «Усё злівалася, як у вялізным вуллі: новы павеў, рэвалюцыя. Там малявалі плакаты. І ўвесь УНОВИС (авангарднае мастацкае аб’яднанне «Сцвярджальнікі новага мастацтва», створанае ў Віцебску Казімірам Малевічам. — Заўвага БЕЛТА) практычна ўдзельнічаў у гэтай рабоце, уключаючы Марка Шагала», — рэзюмавала Ірына Акуловіч.
