Беларусь і Катар абмеркавалі паглыбленне гандлёва-эканамічнага і інвестыцыйнага супрацоўніцтва
Намеснік міністра замежных спраў Яўген Шэстакоў і генеральны сакратар Міністэрства замежных спраў Ахмад аль-Хамадзі. Фота МЗС
22 студзеня, Мінск . У Досе 21 студзеня адбыўся 6-ы раўнд палітычных кансультацый паміж міністэрствамі замежных спраў Беларусі і Катара. Аб гэтым паведамілі ў прэс-службе беларускага знешнепалітычнага ведамства.
Беларускую дэлегацыю на кансультацыях узначаліў намеснік міністра замежных спраў Яўген Шэстакоў, катарскую — генеральны сакратар Міністэрства замежных спраў Ахмад аль-Хамадзі.
У час перагавораў бакі абмеркавалі шырокі спектр двухбаковых, рэгіянальных і міжнародных пытанняў. У адрас прэм’ер-міністра — міністра замежных спраў Катара шэйха Махамеда Бен Абдэльрахмана Бен Джасема аль-Тані было перададзена пасланне міністра замежных спраў Беларусі Сяргея Алейніка, прысвечанае ключавым пытанням развіцця двухбаковых адносін.
«Кіраўнікі дэлегацый абмеркавалі графік маючых адбыцца двухбаковых мерапрыемстваў, падкрэслена зацікаўленасць у актывізацыі абмену візітамі на вышэйшым і высокім узроўнях», — расказалі ў прэс-службе МЗС.
Бакі выказалі зацікаўленасць у больш хуткім правядзенні чарговага пасяджэння сумеснага міжурадавага камітэта па супрацоўніцтве і заявілі аб жаданні інтэнсіфікаваць двухбаковыя адносіны па ўсім спектры.
«Прадметна разгледжаны магчымыя шляхі паглыблення гандлёва-эканамічнага і інвестыцыйнага супрацоўніцтва, развіцця дагаворна-прававой базы, стымулявання ўзаемных паездак грамадзян, уключаючы пытанні ўстанаўлення прамых і чартарных авіяперавозак паміж Мінскам і Дохай. Дасягнуты прадметныя дамоўленасці па першачарговых кроках двухбаковага ўзаемадзеяння», — адзначылі ў ведамстве.
