Чабатар: Беларусь істотна нарасціла экспартныя пастаўкі ў дружалюбныя краіны
Фота з архіва
24 красавіка, Мінск . Беларусь істотна нарасціла экспартныя пастаўкі ў дружалюбныя краіны. Аб гэтым сказаў журналістам міністр эканомікі Юрый Чабатар,
«Прэзідэнт падкрэсліў, што мы забяспечылі макраэканамічную збалансаванасць, фінансавую стабільнасць, аднавілі дынаміку эканамічнага росту. І 2023 год, і пачатак бягучага года характарызуюцца зніжэннем тэмпаў росту інфляцыі. Адпаведна, гэта дае магчымасць нам прырастаць у рэальных даходах, рэальнай заработнай плаце», — расказаў Юрый Чабатар.
Кіраўнік дзяржавы адзначаў, што ўдалося нарасціць значны экспартны патэнцыял. «Мы істотна нарасцілі нашы экспартныя пастаўкі. Толькі за мінулы год экспарт у дружалюбныя краіны прырос больш як на 20 працэнтаў. У прыватнасці, у краіны Азіі — на 40 працэнтаў, Лацінскай і Цэнтральнай Амерыкі — больш як у два разы. Гэта дае магчымасць нарошчваць нашы валютныя паступленні, золатавалютныя рэзервы, — расказаў кіраўнік эканамічнага ведамства. — Ужо не першы год устойлівы курс беларускага рубля. Гэта дае магчымасць утрымліваць пакупніцкую здольнасць нашага насельніцтва».
Што датычыцца сацыяльнай сферы, міністр паведаміў: «У гэтай пяцігодцы мы значна павялічылі будаўніцтва сацыяльнай інфраструктуры. Уводзім новыя школы, дзіцячыя сады, паліклінікі, мадэрнізуем дзеючую інфраструктуру сістэмы аховы здароўя. Гэтыя дасягненні бачны кожнаму грамадзяніну».