Хакеісты мінскага «Дынама» завершаць выязную серыю матчам у Чарапаўцы
Фота з архіва
2 лютага, Мінск . Хакеісты мінскага «Дынама» 2 лютага завершаць чарговае гасцявое турнэ ў рамках рэгулярнага чэмпіянату Кантынентальнай хакейнай лігі,
Другім і заключным пунктам выязнога маршруту для падапечных Дзмітрыя Квартальнава стаў горад Чарапавец, у якім базіруецца бліжэйшы для «зуброў» арыенцір у турнірнай табліцы Захаду — «Поўначсталь». Каманды з’яўляюцца суседзямі на працягу практычна ўсяго сезона: цяпер «сталявары» сёмыя з 63 баламі, у мінчан на 6 ачкоў менш і восьмая пазіцыя. Мінулы месяц дынамаўцы правялі з пераменным поспехам — у трынаццаці паядынках нашы хакеісты здабылі сем вікторый і пацярпелі шэсць паражэнняў.
Чарапаўчане, у сваю чаргу, пачыналі студзень вельмі магутна, выдаўшы пераможную серыю з сямі матчаў, але ў канцы месяца падселі, прайграўшы тройчы за чатыры сустрэчы. У гэтым чэмпіянаце за «Поўначсталь» выступаюць двое беларускіх хакеістаў — нападаючы Аляксандр Скарэнаў і варатар Канстанцін Шостак. Галкіпер цяпер знаходзіцца ў спісе траўміраваных, на пазіцыі першага нумара каманды яго паспяхова замяняе Аляксандр Самойлаў, які ў двух папярэдніх сезонах станавіўся чэмпіёнам Беларусі разам са жлобінскім «Металургам».
«Усе ў камандзе расчараваны рэзультатам матчу ў Сочы. Мы добра правялі папярэдні выезд з гульнямі ў Маскве, Санкт-Пецярбургу і Яраслаўлі, хацелі прадоўжыць у тым жа духу. Але ў хакеі ўсякае бывае: і перамогі, і паражэнні. Бліжэйшы матч будзе важным, таксама як і іншыя. Усе хлопцы думаюць пра плэй-оф, цяпер кожны набраны бал мае вялікае значэнне. Трэба сканцэнтравацца на трэніроўцы і наступнай гульні», — адзначыў абаронца «Дынама» Роб Хэмілтан.
У бягучым чэмпіянаце КХЛ каманды з Мінска і Чарапаўца гулялі паміж сабой толькі аднойчы — 31 кастрычніка на чужой пляцоўцы мацнейшай аказалася «Поўначсталь» (2:1). Другое ў сезоне процістаянне «зуброў» і «рысей» стартуе ў 19.00.
