Іран падключаецца да рэалізацыі праекта ЕАЭС «Еўразійскі аграэкспрэс»
Фота з архіва
7 сакавіка, Масква /Эдуард Півавар . Іран падключаецца да рэалізацыі праекта Еўразійскага эканамічнага саюза «Еўразійскі аграэкспрэс», паведамілі ў прэс-службе Еўразійскай эканамічнай камісіі.
«Як і дамаўляліся ў ходзе работы над поўнафарматнай зонай свабоднага гандлю паміж Еўразійскім эканамічным саюзам і Ісламскай Рэспублікай Іран, пераводзім усе нашы пагадненні ў практычную плоскасць», — адзначыў на праведзенай у Маскве нарадзе з іранскім бокам па пытанні развіцця праекта «Еўразійскі аграэкспрэс» член Калегіі (міністр) па гандлі ЕЭК Андрэй Сляпнёў.
У сувязі з гэтым ён нагадаў, што размова, у прыватнасці, ішла аб пастаўках прадукцыі ЕАЭС у Іран, а таксама аб арганізацыі маштабных аб’ёмаў перавозак іранскай агародніны і фруктаў на рынак краін «пяцёркі». Адпаведныя тавары прысутнічаюць на паліцах магазінаў і сёння. Аднак з задзейнічаннем «Еўразійскага аграэкспрэса» сельскагаспадарчая прадукцыя будзе дастаўляцца больш аператыўна, з лепшай якасцю і меншай колькасцю пасрэднікаў, выказаў упэўненасць міністр.
«Прапануем узаемадзеянне з вялікім іранскім холдынгам, які можа або непасрэдна ўвайсці ў праект, або дзейнічаць у якасці «адзінага акна» для арганізацыі паставак вашых агравытворцаў у Іран і экспарту нашай прадукцыі ў адваротным напрамку», — заявіў, у сваю чаргу, першы намеснік міністра сельскагаспадарчага джыхада Ірана Алірэза Пейман-Пак.
Па выніках сустрэчы бакі згадзіліся прадоўжыць работу ў гэтай логіцы, дэлегаваўшы абмеркаванне канкрэтнага фармату і дэталей супрацоўніцтва дырэкцыі праекта «Еўразійскі аграэкспрэс» — АНА «Еўразійская Агралагістыка» і іранскай кампаніі.
«Пры гэтым мы разумеем, што, акрамя лагістыкі, ёсць і іншыя пытанні, якія неабходна вырашаць. Гэта і ўзаемаразлікі, ветэрынарны і фітасанітарны кантроль, гэта пытанні транзіту праз Іран у бок краін Персідскага заліва і Індыі», — звярнуў таксама ўвагу Андрэй Сляпнёў.
Ініцыятыва аб рэалізацыі сумеснага праекта дзяржаў — членаў ЕАЭС па ажыццяўленні паскораных чыгуначных і мультымадальных перавозак «Еўразійскі аграэкспрэс» у мэтах развіцця рэгулярных узаемных паставак сельскагаспадарчай прадукцыі і прадуктаў харчавання, а таксама экспартных паставак у азіяцкім і еўразійскім напрамках была падтрымана Еўразійскім міжурадавым саветам 25 лютага 2022 года. Распараджэннем міжурадавага савета ад 3 лютага 2023 года праект маштабіраваны на маршруты калідора «Поўнач-Поўдзень».
