Зборная Беларусі заняла трэцяе месца на турніры па хакеі 3х3 у Санкт-Пецярбургу
Фота з архіва
15 снежня, Мінск . У Лядовым палацы Санкт-Пецярбурга прадаўжаецца традыцыйны пераднавагодні турнір па хакеі «Кубак Першага канала»,
Удзел у спаборніцтвах прымаюць зборныя Беларусі і Казахстана, а таксама каманды «Расія 25» і «Зоркі і ВХЛ». Сёння ў рамках Кубка адбыўся турнір па хакеі ў фармаце 3х3, у паўфінале нашы хлопцы сышліся з камандай з лепшых маладых ігракоў КХЛ і мацнейшых прадстаўнікоў Усерасійскай хакейнай лігі. У час сустрэчы беларусы вялі з лікам 3:1 пасля галоў Васіля Філяева, Ягора Борыкава і Віталя Пінчука, але потым упусцілі перавагу і прайгралі па булітах — 3:4.
Сапернікам зборнай Беларусі ў матчы за трэцяе месца стала каманда Казахстана. Гэты паядынак, наадварот, доўгі час быў не на карысць нашых ігракоў. Ужо на сёмай хвіліне беларусы «гарэлі» 0:3, але паспелі выправіць сітуацыю дзякуючы шайбам Віталя Пінчука, Сяргея Кузняцова і Вадзіма Мароза. Гэта сустрэча таксама перайшла ў серыю пасляматчавых кідкоў, але на гэты раз ужо больш дакладнымі былі падапечныя Канстанціна Кальцова — 4:3. Пераможцам турніру па хакеі 3х3 стала «Расія 25», якая перамагла ў фінале каманду «Зоркі і ВХЛ» з лікам 4:2.
У асноўным розыгрышы Кубка Першага канала беларускія хакеісты напярэдадні стартавалі з перамогі над камандай Казахстана (6:2). Заўтра нашых хакеістаў чакае паядынак супраць «Расіі 25», які стартуе ў 15.00. Завершаць выступленні на спаборніцтвах беларусы ў нядзелю матчам з камандай «Зоркі і ВХЛ» (пачатак — у 11.00).
