Кніга спачуванняў будзе адкрыта ў пасольстве Расіі ў Мінску 25-26 сакавіка
23 сакавіка, Мінск . Кніга спачуванняў у
сувязі з тэрактам у Падмаскоўі будзе адкрыта ў пасольстве Расійскай Федэрацыі
два дні — 25-26 сакавіка. Аб гэтым БЕЛТА паведаміў прэс-сакратар пасольства
Аляксей Маскалёў.
Кніга будзе адкрыта для афіцыйных асоб Беларусі і
прадстаўнікоў грамадскіх арганізацый і аб’яднанняў.
«На жаль, пакінуць запіс у ёй змогуць не ўсе
грамадзяне. Гэта абумоўлена і спецыфікай работы загранустаноў, і мяркуючы па
той незлічонай колькасці неабыякавых людзей, якія прыходзяць да пасольства, каб
пакінуць кветкі і выказаць словы спачування, не хопіць ніякай кнігі», —
удакладніў прэс-сакратар.
Разам з тым ва ўсіх жыхароў Беларусі будзе магчымасць
выказаць праз дыпмісію свае спачуванні ў сувязі з тэрактам у Падмаскоўі народу
Расіі. Грамадзяне могуць накіраваць спачуванні на адрас пасольства поштай альбо
па электроннай пошце. «Ні адно такое пісьмо не прападзе, дойдзе да адрасата і будзе
прачытана. У Расіі чуюць словы спачування з боку беларусаў, бачаць вочы,
напоўненыя слязамі, і адчуваюць падтрымку», — запэўніў Аляксей Маскалёў.
На будынку пасольства
Расіі ў Мінску, як і іншых расійскіх загранустановах, у знак смутку прыспушчаны
дзяржаўны сцяг. Сцягі таксама прыспушчаны на будынках генконсульстваў у Брэсце
і Гродне.