Канкурэнцыя, а не канфрантацыя. Эксперт аб якасным складзе кандыдатаў у дэпутаты
9 лютага, Мінск . Аб якасным складзе кандыдатаў у дэпутаты, электаральным суверэнітэце і ўдзеле грамадзян у выбарчай кампаніі ішла размова на дыялогавай пляцоўцы з удзелам кіраўнікоў органаў і арганізацый, што ўваходзяць у сістэму Міністэрства юстыцыі, спецыялістаў галоўных упраўленняў юстыцыі, якія адказваюць за ўзаемадзеянне са сродкамі масавай інфармацыі, паведамілі БЕЛТА ў прэс-службе Мінюста.
Міністэрства юстыцыі з’яўляецца актыўным удзельнікам выбарчай кампаніі, каардынатарам дзейнасці па прававой асвеце, адзначыў міністр юстыцыі Сяргей Хаменка. Удзел у электаральнай кампаніі ён назваў свяшчэнным абавязкам кожнага беларуса.
Аб фарміраванні і пашырэнні аб’ектыўнага грамадска-палітычнага парадку дня ў перадвыбарны перыяд расказала начальнік галоўнага ўпраўлення інфармацыйнай палітыкі і грамадскага развіцця Адміністрацыі Прэзідэнта Таццяна Шэндзік.
Паводле яе слоў, сям’я, армія, царква і дзяржава зведваюць мэтанакіраваныя атакі ідэйных апанентаў. «Работа вядзецца абсалютна беспрынцыпна, белае называецца чорным, чорнае называецца белым», — адзначыла начальнік галоўнага ўпраўлення.
Парыруючы абвінавачванні дзяржавы ў адсутнасці палітычнай канкурэнцыі, Таццяна Шэндзік заклікала не блытаць канкурэнцыю з канфрантацыяй. «Калі паглядзець на электаральную статыстыку, то колькасць кандыдатаў у дэпутаты ў парламент у 2019 годзе была большая. Але давайце паглядзім на іх якасць. Дастаткова сказаць, што каля 5 працэнтаў стабільна ва ўсе выбарчыя кампаніі былі беспрацоўнымі», — заявіла прадстаўнік Адміністрацыі Прэзідэнта.
Яна заўважыла, што кампетэнцыя значнай часткі зарэгістраваных кандыдатаў не адпавядала ўзроўню прыняцця дзяржаўных рашэнняў. «На жаль, доўгі час пад выглядам удзелу ў выбарчай кампаніі ў нашай краіне доступ да публічнай палітыкі атрымлівалі людзі, якія былі арыентаваны не на палітычную спаборнасць, а на канфрантацыю з дзяржавай», — заявіла Таццяна Шэндзік.
Найбольш актуальныя пытанні праводзімай электаральнай кампаніі, навацыі выбарчага заканадаўства агучыў старшыня ЦВК Ігар Карпенка. Ён падкрэсліў, што змяненні і дапаўненні ў Канстытуцыю Беларусі, унесеныя па выніках рэферэндуму ў 2022 годзе, паклалі пачатак маштабнай грамадска-палітычнай рэформе ў краіне, мадэрнізацыі грамадска-палітычнай сістэмы, адлюстраваннем якой будзе правядзенне адзінага дня галасавання і прэзідэнцкіх выбараў у 2025 годзе.
Ігар Карпенка адзначыў важнасць новага паняцця, якое з’явілася ў праекце Канцэпцыі нацыянальнай бяспекі, — «электаральны суверэнітэт». Ён зрабіў акцэнт на фактах умяшання замежных дзяржаў і асобных груп грамадзян у выбарчы працэс, якія мелі месца ў папярэднія кампаніі. Кіраўнік Цэнтрвыбаркама расказаў аб тых выкліках і пагрозах, якія існуюць сёння, і мерах, што прымаюцца па іх нейтралізацыі. Сярод прыярытэтных напрамкаў, якія былі рэалізаваны пры ўдасканаленні выбарчага заканадаўства, ён назваў стварэнне эфектыўнай прававой, інфармацыйнай, фінансавай і тэхнічнай заслоны знешняму ўмяшанню ў выбарчы працэс.
У сваім выступленні Ігар Карпенка таксама падкрэсліў, што беларускае выбарчае заканадаўства ў поўнай меры адпавядае міжнародным стандартам. Ён заўважыў, што ў ходзе экспертызы змяненняў і дапаўненняў у беларускае выбарчае заканадаўства праводзілася параўнанне з Канвенцыяй аб стандартах дэмакратычных выбараў, выбарчых правоў і свабод у дзяржавах — удзельніцах Садружнасці Незалежных Дзяржаў.
У дыялогу з удзельнікамі пляцоўкі былі таксама закрануты пытанні выкарыстання штучнага інтэлекту ў інфармацыйнай сферы, фарміравання сямейных каштоўнасцей, ідэалагічнага выхавання падрастаючага пакалення.
Прадстаўнікі Міністэрства юстыцыі адзначылі актуальнасць разгледжаных тэм пры правядзенні дыялогавай пляцоўкі напярэдадні адзінага дня галасавання.
